Lawngtlai-Paletwa Chawlehnak Lampi Hman A Ngah Ṭhan Cang

Mizoram ramkulh, Lawngtlai in hmun dang ah eidin tirawl phurh a ngah ṭhan cang, tiah CYLA nih nizan July 18 ah an thanh hnu in Mizoram—Chinram, Paletwa chawlehnak lampi zong hman a ngah ṭhan cang, tiah theih a si. CYLA nih nizan July 18 zan thawk in Lawngtlai in hmun dang ah eidin tirawl phurh an onh cang nain Petrol le Diesel phurh tu cu an kham ṭhiam. Thil phurh kong ah hin.

YLA Branch kip nih mahle sang chung in a chuak ding mi motor paoh an zohfelpi hna lai i YLA Branch kip nih pehzulh in an sang cio chekhlatnak an tuah lai, tiah theih a si. “Myanmar ram lei i thil phurh duh ahcun zinglei suimilam 5:00-8:00 kar le zan suimilam 9:00-11:00 kar ah phurh khawh a si i chun hrimhrim ah Myanmar ram lei ah thil phurh a ngah lo. Caan rikhiah mi chung i thil a phur lo mi dawr ngei le kudawng ngei pawl cu.

YLA nih kharpiak an si lai. Cu pin ah thilri ṭhumthlak tik ah sang mi hnacheh lo ding le motor nunter in hnahnawhnak pek hrimhrim lo ding,” tiah Lawngtlai-III YLA nih nihin July 19 ah an thanh. Chinram chung ah Rakhine ralkap AA pawl duh paoh in an cawlcangh i kahdohnak an tuah hnu in Mizoram in Chinram, Paletwa–Rakhine ramkulh lei pehtlaihnak chawlehnak lampi cu CYLA nih a luancia June 24 ni thawk in an rak khar. Thawng dagn rel chap, AA nih tlaih mi paletwa peng aukbaungwe khua mi pathum an thlah ṭhan cang hna.

Chinram, Paletwa peng, Aukbaungwe khua ah Rakhine ralkap AA nih an rak tlaih mi hna kum upa ngai cang mi tualchung mi pathum cu nizan July 18 zinglei ah an thlah ṭhan cang hna, tiah tualchung mi nih an chim. Aukbaungwe khua ah tlaih a tong mi tualchung mi pathum cu AA ralkap nih khuachung ah umnak nawl an pek hna lo caah lo thlam ah an i dor i a luancia July 11 ni ah khan eidin tirawl zal ding in an pathum in khuachung i an luh lio ah Kalawa khuakomh, Halawa khua ah AA nih an rak tlaih hna hnu ah Twikinwa khua ah an hren hna, tiah theih a si.

Tlaih an ton hnu ni 7 a rauh ah an thlah ṭhan hna nain khoika dah an um lai hngalh a si rih lo. Lo tlam ah cun maw an kir ṭhan te hnga, an pathum in kum upa ngai cang mi an si fawn hna i an ngandamnak kong zong ruahpiak ngai an hau. Atu bantuk fur caan i lo thlam i um ṭhan ding cu an ca ah a si kho bak lo,” tiah tualchung mi pakhat nih a chim. AA nih an thlah ṭhan mi hna tualchung mi pathum cu: U Aung Kya(kum 60), a nupi Daw Hwaih Kya(kum 50) le Daw Paik Nwaih(kum 50) an si. AA nih Paletwa peng an uk hnu ah tlaih a tong mi Chinmi hi 15 hrawng an si i nihin tiang an thlah rih hna lo, tiah theih a si.