Mandalay Ah Ngunkhuai Zung, Penguk Zung, Meithat Zung Telh In Zungkip Rianṭuan Non-CDM Pawl Ralkap Training An Kai
Mandalay ah ngunkhuai zung, penguk zung, meithat zung telh in zungkip cozah rianṭuan Non-CDM pawl cu ralkap training an kai kong theih a si. 2024, August thla thawk in SAC uknak tang ah um mi vuanci zung pawl nih an thim mi hna Non-CDM cheukhat pawl cu Pyusawhti ralhrang he hmunkhat ah ralkap training an kai kong le Non-CDM pawl a dang tein kai ter lo in Pyusawhti pawl he an fonh hna kong training kai mi cheukhat nih Khit Thit Meida ah an chim.
Cozah rianṭuan Non-CDM pa pawl cu a phuphu in an ṭhen hna i ralkap training an kai ter hna. An dih in an zung cio ah an kir kho ti lai maw ti zong theih khawh a si rih lo,” tiah Mandalay ah ralkap training kai mi cozah rianṭuan pakhat nih a chim. Cu pinah Mandalay khuapi chung zong ah Mino hna cu thla fatin tuah mi ralkap traning ah hramhram in kaiter an si i Mandalay ramṭhen chung um khuate le khuapi sang cheukhat ah kum upa le ngakchia thleidang lo in ralkap traning an kaiter hna, tiah theih a si.
Kum 35 tang an si ahcun thla fatin ralkap training nan kai lai an ti hna. Kum 36 in 60 kar pa paoh cu Pyitusit training nan kai lai tiin zulhphung an serpiak hna” tiah Pyigyitagon peng tualchung mi pakhat nih a chim ve. Atu lio cu Myanmar ram chung hmun kip ah SAC ralhrang nih SAC luh ding ah mi an khawmhsuat ngai, tiah theih a si. Thawng dang rel chap, Tedim khuapi ah ti petu pa bomb lamsualnak in a ke pakhat bul.
Chinram, Tedim khuapi um siizungpi rianṭuantu hna umnak inn kam ah ti petu Pu Kam Khua Thawn (Kum 45) cu nihin August 23 ni zinglei suimilam 7:00 tluk ah ti va zoh ding in a kal lio ah bomb aa lamhsual i a kehlei ke a bul kong tualchung mi hna sin in theih a si. Siizung ah an thlop lio a si. Operation khan ah an luhpi lio a si. A nunnak caah thinphang a si lo tiin kan theih. Nifate a umkalnak hmun ah bomb aa lamhsual hi a si,” tiah tualchung mi pakhat nih Chin World Media ah a chim.
A luancia ni tlawmpal ah khan siizung rianṭuan pawl umnak inn kam ah meithal puahkeh thawng voi 3/4 hrawng theih a si nain zeiruang ah an puah ti mi tu cu theih a si lo kong, nihin Augustu 23 zing ah ti petu Pa Thawn cu ti va zoh ding in a kal lio ah bomb aa lamh sual hi a si kong le vawlei phum mi bomb a tam ngai kho mi a si caah Myoma sang, siizungpi rianṭuan pawl umnak lei le Tedim Theology College lei ah umkal lo ding kong tualchung mi nih cun an chim.
2024, May 26 ni thawk in Tedim khuapi chung kahdohnak ruang ah khuapi chung ah ti a chuak kho ti lo i tualchung mi nih an remh hnu July 8 ni thawk in khuachung ah ti an ngah ṭhan cang. A luancia July 30 ni zong ah Tedim khuapi, Myoma sang tlangcung um Nah-Tah-Lah dum chung ah uico an i dainak ah vawlei phum mi bomb an lamhsual caah puahkehnak a chuak, tiah theih a si.
