Mandalay PDF Nih SAC Sakhaan 11 An Laak I SAC Lt.Col Pakhat Telhin 15 An Tlaih Hna
Mandalay PDF nih singu peng ah sac sakhaan 11 an laak i SAC lt.col pakhat telhin 15 an tlaih hna. Mandalay ramthen,Singu peng um mi SAC ralhraang sakhaan 11 cu Mandalay PDF nih an laak i SAC lei in Lt.Col Hlaing Htun Aung telhin minung 15 zong a nungin an tlaih hna tiah thawng theih a si. Mandalay PDF nih hin Singu peng chung um mi SAC sakhaan hna cu an tuk cuahmah i Shwe pyi palik sakhaan,latpaan hlat sakhaan, Kyi – Tauk-pauk sakhaan,Kan-Taung sakhaan le Pinlegyi sakhaan hna an laak caah a tu tiang an laak mi hi sakhaan 11 a si cang.
Singu peng chung kahdohnak ah hin SAC nih vanlei in hriam an thlak mi hna telhin hriam dang tampi zong Mandalay PDF nih an laak tiah theih a si i hi kahdohnak chung ah Singu Pakahphah zong nih thilri chanh lei in Mandalay PDF cu an bawmh ve cuahmah hna tiah theih a si. Thawng dang: Lashio Um SAC IB 291 Battalion Sakhaan MNDAA Nih An Laak. Lashio khuapi um SAC Notheast Regional Command kuttang IB 291 battalion sakhaan cu nizan July 5 zinglei sang ah khan Kokang ralkap MNDAA nih an laak tiah theih a si.
Nithum chung kahdohnak a chuah hnu ah 291 sakhaan cu MNDAA nih an laak khawh cang.Lashio khuapi chung ah cun kahdohnak pehtlai in a chuak rih.” tiah Nampawng khuami pakhat nih a chim. Lashio khuapi cu MNDAA nih rallam hmun 5 in an sial i an tuk cuahmah.khuapi pawng um mi SAC IB 68 battalion sakhaan le LIB 507 battalion sakhaan zong an nam cuahmah lio a si i kahdohnak cu nihkhat hnu nikhat in a faak chin lengmang ko tiah thawnghram pakhat nih a chim ve.
Lashio khuachung i July 3 in 5 kar kahdohnak chungah hin tualchungmi minung 13 nak tlawmlo nunnak a liam cang i bomb le kuanzen a tam tuk caah khuami hna cu ral an hrial cuahmah hna tiah theih a si. SAC ralhraang nih Haigeng Agreement an rak ngeih mi cu an buar lengmang caah Shan ram chaklei ah kahdohnak a faak than lai tiah MNDAA nih May 30 ah khan ralrin a rak pek. A tu lio cu Shan ram chaklei ,Lashio,Hsipaw,Kyaukme,Nawnghkio le Mandalay ramthen Madaya, Singu,Thabeikkyin le Mogok peng chung hna i SAC ralhraang sakhaan hna cu dothlennak ralkap hna nih a luancia June 25 khan 1027 operation part – 2 min bunh in an tuk than cuahmah lio a si.
