Matupi Khuapi Chung Um A Tam Deuh Cu Innlo Chuahtak In An Zaam Hna

Chinram, Matupi khuapi um tualchung mi 3,000 leng cu innlo chuahtak in an zaam hna i SAC ralkap nih khuapi chung chawdawr an boh hna i an duh mi thil paoh an laak, tiah theih a si. Chinland Defense Force – Matupi, Brigade 1 le Brigade 2 nih a luancia May 20 in June 5 tiang caan an pek hna i khuapi um tualchung mi cu zaam ding in ralrin an pek hna hnu ah minung 3,000 leng khuapi chuahtak in an zaam, tiah theih a si.

Matupi khuapi in a zaam mi tualchung mi cheukhat cu a kiangkap khuate ah an zaam i a cheu cu India ram, Mizoram ramkulh ah motor le motorcycle i hlan in an zaam hna, tiah theih a si. Khuapi chung ah minung an tlawm ngai cang i SAC ralkap lei zong nih zaam ding in an fial hna. Kanmah kan um lio ah cun dawr ngan deuh mi ah a um mi paoh an laak i sakhan ah an i kalpi,” tiah ralzaam pakhat nih a chim.

Khah-Lah-Yah 304 le Khah-Lah-Yah 140 Byuha sakhan kar ah a um mi Matupi khuapi cu a kaang ve ding dirhmun bantuk a phanh caah SAC ralkap lei zong nih tualchung mi cu thilri nan thiar khawh chung in thiar u, tiah an fial hna. Khuapi chung i a taang mi cheukhat zong SAC ralkap nih siizung ah an chekhlat hna i Byuha sakhan ah an kalpi hna, tiah tualchung mi nih an chim.crd- The Chin Post.

Thawng dang: Mindat Peng Ah SAC Ralkap Nih Vanlawng In Kahdohnak An Tuah Ṭhan. Chinram, Mindat peng chung Circle-2, Chat khua kiangkap ah nizan June 6, zanlei suimilam 4:10 ah SAC ralkap nih vanlawng in kahdohnak an tuah ṭhan, tiah theih a si. Nizan June 6 zanlei SAC ralkap vanlawng kahdohnak ruang ah thi le hliam le innlo a rawk mi a um le um lo fiang in theih a si rih lo.

Hi kong he pehtlai in tualchung mi pakhat nih cun, “Khuachung ngaingai ah cun SAC ralkap nih vanlawng in kahdohnak an tuah lo, khua kiangkap ah vanlawng pahnih in bomb lung 4 an thlak i a rawk mi zong um khawh a si, fiang in theih a si rih lo,” tiah a chim. A luancia June 4 zanṭim zong ah SAC ralkap nih Mindat peng, Yanpan khua ah vanlawng in kahdohnak an tuah i bomb an thlak ruang ah tualchung pakhat a thi i minung pakhat hliam a tuar.

Inn 8 a rawk dih, tiah theih a si. Chinram chung ah vanlawng kahdohnak a tam biknak hmun ah Mindat peng hi aa tel i a luancia April thla chung ah SAC ralkap vanlawng kahdohnak ruang ah Mindat peng ah tualchung hriamtlai phu in ralkap pahnih le tualchung mi 3 nunnak a liam pinah minung 30 hrawng hliam an tuar, tiah Chin Defence Force – Mindat nih May thla hramthawk ah an rak thanh.