Matupi Peng Nih ICNCC Le Chin Brotherhood He Rianṭuanṭi An I Tim

Chinram, Matupi peng ah Matupi peng mipi ukhruaitu phu dirh a si i zatlang ukhruainak rian kalpi an timh kong le ICNCC le Chin Brotherhood he rianṭuanṭi an i timh kong, Matupi peng mipi ukhruaitu phu nih nihin July 27 ah an thanh. “Matupi peng mipi ukhruaitu phu cu a liamcia 2022 October 5-6 ni ah khan rak dirh a si i nikum 2023 October 5-6 ah khan a dih. Cucaah cun mipi ca ah a herh mi zatlang ukhruainak rian cu pehzulh in kalpi ding ah tukum 2024 July 20 ni ah Matupi peng mipi ukhruaitu phu dirh ṭhan a si i mipi ukhruaitu phu chungtel 43 an i tel kho,” tiah an langhter.

Matupi peng mipi ukhruaitu phu nih ṭuan aa timh mi rian kong cu a rauh hlan ah thawng kan thanh ṭhan lai,” tiah Matupi peng mipi ukhruaitu phu in ṭuanvo ngei pakhat nih Matupi Times ah a chim. Matupi peng mipi ukhruaitu phu cu ICNCC le Chin Brotherhood he rianṭuanṭi ding in timhlamhnak an ngei, tiah theih a si. Hi kong he pehtlai in thil sining dikthliar deuh in theih khawh nakding ah Matupi peng mipi ukhruaitu phu cu phone in pehtlaihnak kan tuah hna nain an phone a lut kho lo.

Thawng dang: Falam Khuapi Um Tualchung Mi Cheukhat Ral An Zaam Pah Cang Hna. Chinram, Falam khuapi ah a um mi tualchung mi cheukhat cu a himnak hmun kawl in ral an zaam pah cang hna, tiah theih a si. July thla zarh hnihnak hrawng ah khan Falam khuapi chung ah kahdohnak kalpi an timh, tiin thawngpang a len hnu ah Falam khuapi ah a um mi tualchung mi cheukhat cu thilri timhcia in an um hna i atu ah cun a zaam mi zong an um pah cang hna.

A zaam lo mi chungkhar zong thilri timhcia tein an um kong, Falam khuapi um tualchung mi nih an chim. Falam khuapi ah hin kahdohnak an kalpi te ding cu a fiang pah ko nain hi kong ah hin tualchung hriamtlai phu lei nih thawng an thanh mi a um lo i khuanu khuapa zong nih thawng an thanh mi a um rih lo. A cheu cu Yangon, Kalay lei ah a zaam cang mi zong an um, a cheu cu thawngpang a fian in Falam kiangkap khua lei ah dor aa tim mi zong an um hna.

Zei kan ton lai hngalh a si lo caah ralring tein um a ṭha tiin thilri tete cu timhcia tein kan chiah dih ko, zingzan ei ding facang le mehhang tete zong kan i cawkcia ko. Thawng fiang theih a har caah hin laklawh ngaiin kan um cio i, thawng fiang hna kan theih cun kan zaam te ko hna lai,” tiah Falam khuapi ah a um mi tualchung mi pakhat nih The Chin Post ah a chim. Falam khuapi um khuanu khuapa le a kiangkap khua 9 in minung 70 leng cu Nunphung Innpi ah tonbiaruahnak ngei in.

Falam khuapi boruak kong ceihmainak an rak ngei i Falam khuapi le a kiangkap khua paoh ralzaam lo ding in le mahle umnak inn cio ah um ding in lungtlinnak an ngeih kong, Falam Pawlpi, Falam Committee nih a luancia May 31 ah khan an rak thanh. Atu i Falam khuapi ah a cang cuahmah mi kong he pehtlai tu cun cathanh an chuah mi a um rih lo i Falam mipi sin ah thawng an thanh mi a um rih lo, tiah theih a si.crd- The Chin Post.