Minung 5 Cung A Bu In Um Khawh A Si Lo, Tiah Nawl Chuah Mi Cu Sac Nih An Hnon Cang
Hakha khuapi khuathar sang ah minung 5 cung a bu in um khawh a si lo, tiah nawl chuah mi cu sac nih an hnon cang. Chinram, Hakha khuapi, Khuathar sang chung ah minung 5 cung a bu in um khawh a si lo tiah SAC nih nawl an rak chuah mi cu SAC nih an hnon ṭhan cang i atu ah cun pumhkhawmh le thlacamnak tibantuk tuah khawh a si cang, tiah theih a si. A luancia June 23 ni thawk khan minung 5 cung a bu in um khawh a si lo, tiah nawl chuah mi cu SAC nih an hnon cang nain.
Khuathar sang chung i chawdawr an kharter mi hna tu cu a ra lai mi August 20 tiang kharpiak rih an si lai, tiah Khuathar sang um mi pakhat nih a chim. A luancia April 12 ni ah khan Hakha khuapi ah SAC kuttang Minister pawl nih an i cit mi motor cu CDF-Hakha nih Drone in bomb an rak thlakhnawh hnu in “chawdawr le Biakinn ah humhimnak an la” tiin khuathar sang chawdawr cu SAC nih an kharter hna i minung 5 cung a bu um lo ding tiah April 22 ni ah nawl an rak chuah. Hi kong ah hin SAC nih cun a luancia June 7 ni ah khan Hakha khuanu khuapa le Pastorte cu Chin nunphung ning tein.
Saram thisen luanh in ngaihthiam hal ding in an rak ti hna i cu hnu lawng ah nawlchuah mi hnonpiak ding in an rak ti hna nain Chin nunphung ning in i lenkainak a um lo, tiah theih a si. Hakha khuapi ah hin a bu in tuah ding mi thil kong le pumhkhawmh kong ah atu tiang SAC sin ah theihternak tuah hmasa a hau, tiah theih a si.crd- The Chin Post. Thawng dang: Chin ramkulh thlanglei Matupi Operation cu Chinland Council ralkap ttangti phu hna nih an kalpi cuahmah ko i a tu kahdohnak cu Arakan Army AA le Chinland Council ralkapbu hna karlak kahdohnak a si cang tiah theih a si.
Chin Brotherhood hna nih a luancia June 24 ah khan Chinland Council ralkap hna cu Matupi in kan dawi cang hna tiah an rak taar nain cu cu a dik mi a si lo i Chinland Council ralkap nih Matupi ah operation an kal pi cuahmah ko tiah Salai Htet Ni nih a chim. “Matupi in kan chuak lo,Operation a kal cuahmah ko.” Tiah a chim. June 18 in a rak i thok mi Chin Brotherhood le Chinland Council kar buaibainak cu a tu ah AA le Chinland Council buainak ah a tla cang tiah Salai Htet Ni nihcun a chim.
Chin miphun huap in ral lei le ramkhel lei kan lung aa khah khawh lo nak cu caan tha laa in local hriamtlai phu hna nih AA i sawm in Chin ram an kan rawlh a si.hi ti thil an tuah mi cu Chin mi caah tuar a har bik mi a si.” tiah a chim. Matupi i a chuak cuahmah mi Kahdohnak ah hin Chin Brotherhood cu AA ralkap hna thilri chan tu an si i Arakan Army hi an tam ngai ngai tiah a chim. Hi kong he pehtlai in Chin Brotherhood,CDF-Matupi –Briage 1 in Salai Boi Uk nih cun “ A tu Matupi Operation cu CB Operation a si i AA nih a kan bawmh bia a si.” tiah a chim ve.
