President Henry Vanthio Cu Ralhrang Nih Inn Thong Ah An Chiah Cang

April 22 ah Vice resident Henry Van Thio cu a rian in an chuah hnu ah, ralhrang nih inn thong ah an chiah i phone zong an hmanter lo caah a chungkhar pawl he zong pehtlai kho a si lo tiah theih a si i, Henry Van Thio i personal assistant a si mi Phyo Myint Tin cu chawhvahnak nawl an pek,tiah ralhrang secretary Aung Lin Dwe nih a chim. Henry Van Thio cu 2015 election ah teinak a hmuh i, Amyota Hluttaw aiawhtu ah a cang i, 2016 kum March 30 ah,Vice president ah thim a rak si.

NLD nih thim mi Vice president Henry Van Thio cu ralhrang hna he a fonh caah, NLD party member sinak in an chuahnak cu 2023 kum August thla ah thanh a rak si. 2016-2021 chung NLD nih zumhnak in rian a tuan ter hnu ah, Henry Van Thio cu Vice president ah a rak cang nain, atu ah ralhrang pawl he July 31 ah a fonh tiin NLD party nih an thanh. August 8 ah NLD committee nih Henry Van Thio cu party member in chuah ding in, zapi hnatlaknak meeting ah biakhiahnak an rak ngei hna.

Thawng dang relchap, tonzaang khua ah a um mi Kha-La-Ya (269) SAC ralkap sakhaan cu CNA le CDF ralkap hna nih nizaan May 16 in doh hram an thawk i, nihin May 17 tiang zong ah pehzul in kahdohnak a um, tiah thawng kan theih.  CNF/CNA chimnak nawlngei Salai Htet Ni nih, “Tonzaang SAC ralkap sakhaah cu doh hram kan thawk cang. SAC ralkap nih vanlawng in voi 3 bomb a rak kan tlak. ZRA he kan i kah mi a si lo,” tiah nizaan May 16 ah khan Khonumthung ah a chim.

Tonzaang khuami pakhat nih, “Nizaan zinglei in an i kap i, nihin zinglei sml. 4:00 tiang meithal thawng kan theih. Cun, nihin zinglei sml. 8:00 hrawng in i kah thawng kan theih ṭhan. Cu hnu cun meithal thawng kan thei ti lo,” tiah a chim. Tonzaang khuachung i SAC ralkap an umnak Penguk Zung (GAD), Meithat Zung le a dang hmunhma pakhat hi CNA le CDF ralkap pawl nih Drone in an doh i, Tonzaang he meng 3 hrawng a hlatnak lampi zong ah kahdohnak a um, tiah tualchungmi hna nih an chim.

Tonzaang khua kahdohnak ah SAC ralkap lei ah ZRA ralkap pawl an ṭang ti mi thawngpang zong a leng ngai. Asinain, cu thawngpang a dik le dik lo tu cu The Hakha Post nih kan fehter kho lo. Tonzaang khua kahdohnak ah kap hnih hliampu le a thi mi an um le um lo fiang in theih a si lo. Kahdohnak ruang ah Tonzaang khuami zatuak in 20% hrawng cu ramtang ah an zaam hna, tiah theih a si.