SAC Caan Karlak President U Myint Shwe Cu Tuhi Fak Ngai In A Zaw Ee
SAC nih caan karlak President ca ah an thim mi U Myint Shwe cu a ngandamnak nih a tlinh ti lo i a derthawm ngai cang caah an thlopbul cuahmah kong, SAC uk mi Media pawl nih nizan July 18 ah an thanh. A luancia June 30 in July 14 tiang ah U Myin Shwe cu SAC kuttang Health Ministry nih an thlopbul nain aa ning hlei lo i rawl a ei khawh ti lo caah SAC duhning in rian a ṭuan kho ti lo, atu zong SAC nih a ngandam lonak kong ah chekhlatnak an tuah cuahmah, tiah SAC uk mi Media pawl nih an thanh.
U Myin Shwe cu a liamcia 2023 kum hramthawk in cawlcangh aa harh i tirawl a eidin khawh ti lo caah siibawi sang pawl nih an thlopbul nain aa ning kho hlei lo. A derthawm ngai i a dam lonak a tam ngai caah tukum 2024 April thla chung ah Singapore ram ah an kalter i an thlopbul. A luancia June 18-30 tiang dinh caan la in a umnak inn ah an thlopbul,” tiah an langhter. SAC ralkap nih hramhram in nawlngeihnak an laak hnu ah U Myint Shwe cu SAC nih caan karlak President ah an thim i July thla dongh ah a ṭuan caan a dih ding a si.
Cu bantuk ṭhiamṭhiam in Vice President U Henry Van Ṭhio zong a ngandamnak nih a tlinh ti lo caah SAC nih dinhnak nawl an pek, tiah SAC uk mi Media nih a luancia April 22 zan ah Henry Van Ṭhio kong cu an rak thanh. Thawngd ang rel chap duh mi caah rel chap ding kan peh rel chap, Mindat peng ah SAC ralkap vanlawng bomb thlaknak in tualchung mi pakhat thi, Chinram, Mindat peng, Circle-12 hmunram khuate pakhat ah.
SAC ralkap nih nizan July 17, zanlai suimilam 12:19 ah SAC ralkap nih vanlawng in bomb an thlak ruang ah tualchung mi pakhat a nunnak a liam i minung pakhat hliam a tuar, tiah CDF-Mindat nih nihin July 18 ah an thanh. Nizan July 17, zanṭim vanlawng bomb thlaknak ruang ah cun tualchung mi thi le hliam an um pin ah phungki sianginn pakhat zong a rawk. Mindat khuapi le a pawngkam hrawng ah SAC ralkap nih zanfatin in 120mm hriamngan an kah peng, tiah Mindat tualchung mi nih an chim.
A luancia July 10, zinglei suimilam 10:30 ah SAC ralkap nih Mindat khuapi chung ah a ruang um lo in kahdohnak an tuah i 120mm hriamngan an kah ruang ah ralzaam buuk cheukhat a rak rawk. April thla chung zong ah khan SAC ralkap vanlawng kahdohnak ruang ah Mindat peng ah tualchung hriamtlai phu in ralkap pahnih le tualchung mi 3 nunnak a liam i minung 30 hrawng hliam an rak tuar.
