SAC Nih Rak Tlaihmi Chin Ralzaam 38 Cu An Chanhchuah Khawh Cang Hna Ee
Chinram, Kanpetlet peng ah SAC ralkap nih an rak tlaih mi hna Chin ralzaam 38 cu an chanhchuah khawh hna kong Chin Defence Force – Kanpetlet nih an chim. Kanpetlet peng, Kyindwe khuapi kahdohnak ah sakhan chuahtak in a zaam mi SAC ralkap nih a luancia May 14 ni ah Ung khua ralzaam 38 cu an rak tlaih hna. Cu tlaih a tong mi ralzaam 38 cu nizan May 17 ni ah an chanhchuah khawh hna kong Chin Defence Force – Kanpetlet in ṭuanvo ngei pakhat nih a chim.
A luancia May 14 ni ah SAC ralkap nih an tlaih mi hna ralzaam chung in nu 27, pa 11 an si i, cu chung ah kum tling lo ngakchia pahnih, tar pakhat le hawi lo lo mi pakhat an i tel, tiah theih a si. SAC ralkap nih an tlaih hna lio ah a zaam i a luat mi ralzaam 4 belte cu nihin tiang hmuh an si lo kong, ralzaam mi nih an chim. thawng dag rel law a tang cem ah a video um lai, Waingmaw peng sac ralkap sakhan 10 cu KIA hruaimi ṭangṭi phu nih an kah i sakhan 4 an laak cang.
Kachin ramkulh, Waingmaw peng um SAC ralkap sakhan 10 cu KIA hruai mi tualchung hriamtlai ṭangṭi phu nih an kah i sakhan 4 an laak cang kong, KIA thawng laaknak hrampi nih an chim. Nihin May 18, zinglei suimilam 5:00 in Waingmaw peng chung ah a um mi SAC ralkap nih hrambunh in an umnak Kazu, Dabat, Gayayan, Shwenyaungpin, Khah-Lah-Yah 321, Deinka, Laiphaung, Bintpukaung le Aungmyae-1 telh in sakhan 10 cu KIA le PDF ṭangṭi phu nih voi khat kah ah an kah, tiah theih a si.
Shwenyaungpin ah a um mi Shwemin Pyituhsit sakhan zong an laak cang, Aungmyae-1 ah a um mi Pyitusit Battalion le SAC ralkap sakhan zong an laak khawh, atu hi sakhan 4 hrawng cu KIA ṭangṭi phu nih an laak cang, kahdohnak ah SAC ralkap nih hriamngan le vanlawng an hman,” tiah KIA thawng laaknak hrampi nih an chim. Nihin May 18 zinglei ah Waingmaw peng, Shwenyaungpin zong ah kahdohnak a fak i.
SAC ralkap nih an hman mi Helicopter pakhat cu KIA nih an thlak khawh tiah thawngpang a leng nain KIA chimnak nawlngei nih a fehter rih lo. KIA nih a luancia March 7 ni thawk in Kachin ramkulh chung ah kahdohnak an kalpi i SAC ralkap sakhan 100 hrawng an laak cang, tiah theih a si.
