SAC Nih Tlaihkhih Mi Chinmi 70 Leng An Chuah Ṭhan Hna I SAC Lut Ding In Timhlamhnak An Ngeihter Cia Hna
Nay-Pyi-Taw SAC ralhrang hmunram, Lewe peng, Kyaukoe khua ah Chinmi pa 70nak tlawm lo cu tlaihkhih naak hmun in an chuah hna i SAC ralhrang lut ding ah timhlamhnak an ngeihter cia hna, tiah tualchung mi nih an chim. 2024, September 19 ah SAC ralhrang nih an tlaihkhih hna i September 20, zingka ah an chuah ṭhan colh hna, tiah theih a si. Chinmi pa 70nak tlawm lo hna hi SAC ralhrang cunglei nawlpeknak an hmuh in ralkap training zarhhnih chung an kai lai, tiah theih chih a si. Cunglei nih uniform an chiah piak hna bak in ralkap training zarhhnih chung kai ding in an laak ṭhan hna lai.
Training an dih in khua ah an tlung lai i SAC ralhrang nih an kawh auh ṭhan tik hna paoh ah zing le zan thleidang lo in an zulh hna lai” tiah tualchung mi pakhat nih a chim. Ralkap training an dih hnu in SAC ralhrang nih thla 1 ah lahkhah sing 200,000 an pek hna lai i a herh tik paoh ah kawh auh ding (reserve) pawl caah lahkhah sang 50,000 an pek ve hna lai, tiah theih a si.Ralkap training kai ding in kawh auh mi chung ah kum tlinglo ngakchia le kum upa zong an i telchih, tiah an langhter.
Thawng dang: Ngazun peng, ngamyainggyi khua ah sac nih cunglei in bomb an thlak i tualchung mi 10 le dohthlennak hriamtlai phu 2 nunnak liam Mandalay ramṭhen, Ngazun peng, Ngamyainggyi khua ah SAC ralhrang nih cunglei in bomb an thlak i tualchung mi 10 le dohthlennak hriamtlai phu 2 dihlak fonh minung 12 an nunnak liam, tiah tualchung mi nih an chim. 2024, September 10 zanlei suimilam 5:00 ah Mandalay ramṭhen, Ngazun peng, dohthlennak hriamtlai phu nih an laak mi.
Ngamyainggyi khua ah kahdohnak zeihmanh um lo in SAC ralhrang nih cunglei in bomb an thlak i tualchung mi 10 le dohthlennak hriamtlai phu 2 nunnak a liam, tiah theih a si. Cunglei in kahdohnak an tuah tanglei ahcun zeibantuk kahdohnak hmanh a um lo. Cunglei In voithum tiang Rocket 6 le bomb 2 an thlak pinah seh meithal an kah chih i tualchung mi 10 le dohthlennak hriamtlai 2 an nunnak liam, midang 20 tluk nih hliam an tuar” tiah tualchung mi pakhat nih a chim. 2024, August 19 ah Ngazun peng, Ngamyainggyi Pyusawhti khua hi mipi ralkap nih an kah i an rak laak, tiah theih a si.
