SAC Ralkap Nih Chin Nu Kum 12 Ngakchia Pakhat An Tlaihhrem

Tedim Peng, Mualpi Khua Ah Kum 12 Nu Ngakchia Pakhat SAC Ralkap Nih An Tlaihhrem. Chinram, Tedim peng, Mualpi khua ah kum 12 nu ngakchia pakhat cu nizan July 5 ah Kalaymyo in Chinram lei ah rallam sial in a kai mi SAC ralkap nih an tlaihhrem, tiah Chin World nih a ṭial. “July 4 ni ah khan Kalaymyo in motor he Chinram lei ah SAC ralkap pawl rallam an sial caah kum 12 nu ngakchia le a chungle pawl cu lo thlam an riak. Nizan July 5 ni ah SAC ralkap nih inn tlun khawh a si cang an ti hnu ah a nu nih inn va zoh ding in a fial i an innchung ah SAC ralkap pahnih nih luhhnawh in an tlaihhrem.

Bawmh hal in a au nain a pawngkam um mi SAC ralkap nih an chanh duh lo,” tiah tualchung mi pakhat nih a chim. Tlaihhrem a tong mi i hringtu a nu le nungak pakhat zong tlaihhrem an timh hna nain an zaam manh. Khua mi cheukhat nih SAC ralkap Commander pa an va ton i thil sining an chimh hnu ah chekhlatnak an tuah colh. Kum 12 ngakchia nute cu tangka an pek. Tlaihhrem hmang mi SAC ralkap pahnih cu puan in an tuam hna i motor cung ah an khin hna, cu hna pahnih nih an hruk mi Uniform ah cun zeibantuk chingchiahnak(ṭazeih) hmanh a um lo.

SAC ralkap pawl cu Kalaymyo lei ah an kir colh,” tiah tualchung mi pakhat nih cun a chim chap. SAC ralkap pawl cu July 4 ni ah motor 6 in Kalaymyo in Chinram, Tedim lei ah an kai i nizan July 5 ni ah an kir ṭhan, tiah theih a si. Crd-the chin post. Thawng dang: Myanmar Ram Buainak Kong Ah CYLA Cu Aa Tel Ve Ding A Si Lo – AA. Central Young Lai Association (CYLA) nih AA sin a lut ding petrol le diesel phikhamnak a tuah mi cu an pehzulh peng i.

Rakhine ralkap AA nih Chinram ah kahdohnak an ngol hlan lo cu Lawngtlai in Paletwa–Rakhine lei pehtlaihnak lampi kan phih lai,” tiah an thanh. Hi kong ah United League of Arakan/Arakan Army (ULA/AA) chimnak nawlngei Khine Thukha nih cun, “Myanmar ram buainak ah CYLA cu an i tel ve awk hrim a si lo,” tiah The Irrawaddy ah a chim. Myanmar ram buainak kong i CYLA an i thlak ve nih hin buainak lam a karhter chin. Hi bantuk India ram chung bu pakhat nih Myanmar ram chung buainak i aa thlak ve mi hi cu cohlan awk a ṭha lo mi a si,” tiah ULA/AA chimnak nawlngei Khine Thu Khah nih cun a chim.

CYLA lei nih AA cu Chinram chung ah kahdohnak tuah lo ding in le Chinland Council ralkap he i kap lo ding in atu le atu an nawl hna nain AA lei nih lehnak zeihmanh an tuah lo caah India le Myanmar chawlehnak lampi cu a luancia June 24 ni thawk in CYLA nih an phih i a bik in Arakan Army sin ah Petrol le Diesel a lut ding mi cu CYLA nih an kham dih. AA nih Chinram ah kahdohnak an ngol hlan lo cu phihkhamnak an tuah peng lai kong CYLA President HC. Vanlalruatpuia nih a chim ve.