SAC Ralkap Pawl Cu Tilawng In A Zaam I Anmah SAC Ralkap Lila Nih An Ṭhawl Hna Caah An Tilawng Aa Let

Tilawng in a Zaam mi SAC Ralkap pawl cu Anmah SAC Ralkap Lila nih an Ṭhawl hna caah an Tilawng aa Let. Rakhine ramkulh, Mawngdaw in a zaam mi SAC ralkap tilawng pahnih cu anmah SAC ralkap lila nih tikam ah naihnak nawl an onh hna lo i meithal in an kah hna caah tilawng a pahnih ning in aa let, tiah theih a si. Mawngdaw ramri congtu SAC ralkap bu hnih in ralkap pawl le an chungkhar pawl cu AA he kahdohnak ruang ah tilawng pahnih in Maw-Ya-Wadi hmunkhuar SAC ralkap sakhaan lei panh in an zaam nain Maw-Ya-Wadi SAC ralkap nih cun tivakam ah naihter an duh hna lo i meithal in an kah hna hi a si.

Tilawng pahnih in a zaam mi SAC ralkap le an chungkhar pawl cu Maw-Ya-Wadi SAC ralkap nih meithal in an kah hna caah tivakam an panh kho lo i an ti lawng cu aa let. Tilawng lehnak ruang ah ngakchia pahnih le SAC palek nu pahnih an tlau, tiah video a thlatu SAC ralkap nih a chim. A tanglei video hi SAC ralkap tilawng pahnih aa leh hnu thil sining a si i, anmah SAC ralkap pakhat nih a thlak mi a si. Crd- The Hakha Post.

Thawng dang: Mindat Khuapi Ah SAC Ralkap Nih Mino 4 An Tlaih Hna. Mindat khuapi chung ah umhmun a khuar mi SAC ralkap nih Mindat khuapi chung ah a um mi mino 4 cu June 8 ni ah khan a ruang um lo in an tlaih hna, tiah theih a si. Hi kong he pehtlai in tualchung mi pakhat nih cun, “SAC ralkap nih mino 4 an tlaih hna tiah kan theih nain aho ti hngalh an si lo, Moepitaungdan Cargate lutlai zong aa tel,” tiah a chim.

Atu hrawng cu SAC nih Helicopter in Mindat khuapi um Division 11 le Division 77 ah ralkap thazaang chap in hriamnam tam ngai an thlak, 127 Battalion nih khuate lei le an duhnak hmun paoh ah hriamngan an kah, tiah theih a si. Mindat khuapi chung ah minung an um lonak inn hna ah SAC ralkap le palik i dup in umhmun an khuar hna i siizung luhchuahnak hmun zong ah biatak tein chekhlatnak an tuah, tiah theih a si.crd- The Chin Post.