Tonzang Peng, Cikha Khuapi Cu Chin Hriamtlai Ṭangṭi Phu Nih An Laak
Chinram, Tonzang peng, Cikha khuapi cu Chin ralkap ṭangṭi phu nih a ningpi in an laak khawh cang, tiah theih a si. CNA le CDF ṭangṭi phu nih Cikha khuapi um SAC sakhan hi nihin May 19, zinglei ah an laak. Chin ralkap ṭangṭi nih sakhan hi an kah hnu ah SAC ralkap pawl cu sakhan chuahtak in an zaam i ṭangṭi phu nih hriamnam tam ngai zong an laak, Cikha khuapi cu Chin ralkap nih a ningpi in an uk cang, tiah theih a si. Cu bantuk ṭhiamṭhiam in Tonzang khuapi zong Chin ralkap ṭangṭi phu nih a luancia May 15 ni in kah hram an rak thawk i May 17 ni tiang i kahdohnak ah.
SAC ralkap 10 an thi, hliam a pu mi zong an tam ngai, cu kahdohnak ah cun SAC palik sakhan zong an laak khawh. SAC ralkap sakhan zong pehzulh in an kah i an laak khawh deng cang, ṭangṭi phu nih Tonzang khuapi cu zatuak 90 an laak cang, tiah theih a si. Tonzang khuapi le a peng chung Cikha khuapi kahdohnak ah hin CNA, Mizo Chin Rifile(MCR), CDF-KKG , CDF-Tonzang, CDF-Thantlang, PDA (Tedim), CDF CDM-Siyin, CDF-Hualngoram, YDF (Yaw), CDF-Asho Chin, CDF-Hakha, CDF-Zanniatram le CDF-Matupi an ṭangṭi, tiah theih a si.
Hi kong he pehtlai in CNF/CNA chimnak nawlngei Salai Htet Ni cu phone in pehtlaihnak tuah kan timh nain phone call a luh khawh lo caah thawng fiang deuh le tling deuh kan hal kho lo. Chin ramkulh, Tonzang khuapi le Cikha khuapi cu Chinland ralkap CNA le ṭangṭi phu hna nih an laak khawh cang, tiah theih a si. “Nihin 2024, May 19 ah Tonzang peng, Cikha khuapi cu Chinland ralkap CNA le ṭangṭi phu hna nih an laak khawh cang, nihin zing ah kan ralkap hna nih.
Drone in an luhhnawh hna i SAC ralhrang pawl an um ti lo, kan laak khawh cang” tiah Chinland ralkap CNA in chimphuannak nawlngeitu Salai Htet Ni nih a chim. Tonzang khuapi le Cikha khuapi cu 2024, May 15 thawk in Chinland ralkap CNA le ṭangṭi phu hna nih an kahdoh cang i nihin 2024, May 19 ah khuapi chung an lut kho cang, tiah theih a si. “Cikha khuapi in a zaam mi SAC ralhrang pawl cu Tonzang khuapi hrambunh SAC ralhrang pawl sin ah an i fonh tiin kan theih” tiah Salai Htet Ni nih a chim.
Cu pin ah Tonzang khuapi um palik sakhan le SAC ralhrang sakhanpi telh in SAC ralhrang nih umhmun an khuarnak hmun hna cu Chinland ralkap CNA le ṭangṭi phu hna nih an laak khawh cang i khuapi chung zohfelnak (hmunhma thianhliamnak) an tuah liopi a si, atu hi pehtlai in kahdohnak a chuak rih, tiah theih a si. “Tonzang khuapi chung ah pehtlai in kahdohnak a um rih i SAC ralhrang nih nihin May 19 zing zong ah cunglei kahdohnak a tuah rih, cu caah.
SAC ralhrang pawl an thiang dih cang tiin kan chim kho rih lo” tiah CNA in chimphuannak nawlngeitu Salai Htet Ni nih a chim chap. “Nihin May 19 zing Tonzang khuapi kahdohnak ah CDF – Hualngoram ralkap in kum 26 a si mi pasalṭha 1 nih ram le miphun caah a nunnak a pek, tiah CDF-Hualngoram in ṭuanvo ngeitu Pu Puite nih a chim ve.
