Vaurawng Nih Mizoram Lei Minh Ruangah Harnak A Tong Mi Bawmhnak An Pek
Mizoram Lei Minh Ruangah Harnak A Tong Mi Bawmhnak Ca Ah Vaurawng Nih CYMA Cu ₹ 1,000,000 bawmhnak An Pek. A liamcia May 28 ah a cang mi Aizawl le a kiangkap lei minh ruang ah ngaihchiatnak a tong mi hna bawmhchanhnak ca ah Vaurawng group nih Central Young Mizo Association(CYMA) cu ₹ 1,000,000 an bawmh hna. Mizoram lei minh ruang i ngaihchiatnak a tong mi hna ca ah hin Vaurawng Zuunthil nih CYMA hruaitu hna cu zing 4 chung tlangaunak an ngeihpi hna i, zing 4 chung ah a chuak mi phaisa ₹1,000,000 cu Mizoram um Vaurawng Zuunthil team in hlasakthiam Iang Len Sung, Biak Hlei Par,
Miley Sui, Pu Stephen le Pu Tlir Lian Thang hna nih CYMA General Secretary Profesor Malsawmliana le Finance Secretary Pu MS Ralte sin ah tuzing sml 11 ah khan pekchanhnak an ngei. A liamcia May thla dongh i a cang mi lei minh ruang ah Aizawl khuapi le a kiangkap ah minung nunnak 33 a liam i, ruak 30 cu hmuh a si nain ruak hmuh lo mi 3 an um. Nizan June 12 zong ah Mamit district ah lei minh ruang ah minung 3 nunnak a liam, tiah theih a si.
Mizoram lei minh ruang ah harnak a tong mi hna ca ah CYMA le Chief Minister sin ah CBCUSA, NUA le CNDF zong nih phaisa zeimawzat bawmhnak an rak pek cang.crd- The Chin Post. Thawng dang: MTC/MDF Le IMC/CDF-Mara Nih Kaphnih Kar Remdaih Hnatlaknak An Rak Ngeih Mi An Hrawh Ṭhan. Mara biaknak lei hruaitu tawlrelpinak in Mara hriamtlai phu MTC/MDF le IMC/CDF-Mara cu kaphnih kar remdaih hnatlaknak an rak ngei nain caan a rauh hlan ah MTC/MDF lei nih hnatlaknak an ngeih mi an zul duh lo tiin i fumtomnak(Reunification) rian kalpi timh mi an ngol kong, IMC/CDF-Mara nih nihin June 12 ah an thanh.
Mara hriamtlai phu hnih IMC/CDF-Mara le MTC/MDF cu Mara Evangelical Church tawlrelpinak in a luancia May 22-23 ni ah kaphnih hruaitu minung 8 veve in tonbiaruahnak an ngei i remdaihnak le i fumtom ding kong ceihmainak ngei in kaphnih hnatlaknak phun 7, zulhphung le pehzulh ding mi rian kong ah hnatlaknak phun 8 tiin minsen an rak thut hnu, thla khat hmanh a tlin hlan ah kaphnih kar hnatlaknak an ngeih mi ngol a si kong, IMC/CDF-Mara nih nihin an langhter. Kaphnih lungtlin hnatlaknak rak ngeih bantuk in minsen thut ni thawk in ni 14 chung ah IMC/CDF-Mara nih a hren mi.
MDF ralkap 4 cu a caan he aa tlak ning in an luat khawh nakhnga a luancia June 1 ni ah Lailenpi khuapi ah kalpi in luat ding ah timhlamhpiak an rak si nain MTC/MDF nih an hren mi CDF-Mara ralkap 3 thlahpiak ve ding in atu le atu IMC/CDF-Mara nih nawlnak an tuah mi an duh lo ruang ah remdaihnak le i fumtom ding in hnatlaknak ngeih mi phung cu MTC/MDF nih langsar ngaiin an buar a si. Remdaihnak tlau ding in timh ciammam tein MTC/MDF thil tuah mi ruang ah hin i fumtomnak(Reunification) kalpi timh mi rian cu ngol a si cang, tiah IMC/CDF-Mara nih an thanh mi ah a langhter. Hi kong he pehtlai in Mara Territorial Council/Maraland Defence Force lei nih cun atu tiang ah zeibantuk cathanh hmanh an chuah mi a um rih lo.
