ZORO Hruainak in CNF, Chinland Council le ICNCC Ton Biaruahnak an Ngei
Mizoram hrambunh Zo Re-Unification Organization (ZORO) hruainak in nihin September 21 ah Chin National Front (CNF), Chinland Council (CC) le Interim Chin National Consultative Council (ICNCC) ton biaruahnak an ngei, tiah thawng kan theih. Cu ton biaruahnak cu nihin chun sml. 12:00 ah Aizawl khua ah an tuah i, CNF in Vice Chairman (I) Pu Thang Ning Kee, CC in Chief Minister Pu Pa Thang le ICNCC in Salai Lian Luai an kai hna.
Nihin ton biaruahnak ah lungtlinnak panga an ngei: Pakhatnak ah Kannih Chin-Kuki-Mizo hi thisa khat, holh hram khat, nunphung khat unau kan si. Pahnihnak Kan ram le miphun ca ah duhsaknak faak tuk in ṭuanhma kan laaknak ah i hmuh thiam lonak a ummi hi a poi kan ti i, hmailei ah cu bantuk cu um ti hlah seh. Pathumnak Hi hnu ah buaibainak le harsatnak a um tik ah hriamnam hmang in i dir-onhnak um ti hlah seh. Palinka ZORO hruainak in tuahmi remdaihnak hi a ṭha kan ti i, remnak tlamtling a um nakhnga caan karlak ah a herh ning in i chawnhbiaknak tuah si te seh.
Panganak Remdaihnak Committee ser cu a ṭha tiah kan ti i, hi hnu meeting ah cu committee cu ser si te seh. ZORO hruainak in tuahmi nihin tonnak ah hin Chin Brotherhood zong in palai an kai ve i hnatlaknak zong ah min an thut ve, tiah theih a si. Thawng dang: Mizoram, Aizawl khuasa Pi Lal Thiang Hlim nih Mizo Baibal Thiang cu kum 10 chung ah uk 11 a kut in a ṭial, tiah theih a si. 2015 July thla thawk khan Pi Lal Thiang Hlim nih a kut in Baibal ca ṭial/tlen hram a thawk i, ni 422 a rauh hnu ah uk khat ning in a rak ṭial dih khawh.
A voi hnihnak ṭial ṭhan ah ni 299 a rau, a voi thumnak ah ni 384 a rau,a voi linak ah ni 335 a rau a voi nganak ah cun ni 254 lawng a rau cang. Baibal Ca a ṭial ning a rang chin thluahmah i a voi 11nak ah cun ni 189 lawng a rau cang, tiah theih a si. A kut in a ṭialmi Baibal cauk pawl cu book form in a tuah hna i, 2024 August 7 ah khan a uk 11nak a chuah khawh. Zinglei sml. 2:00-5:00 karlak asiloah zinglei sml. 3:00-5:00 karlak ah hin Pi Lal Thiang Hlim nih Baibal Ca a ṭial tawn, tiah theih a si.
